10, మే 2019, శుక్రవారం

ఆసక్తి [Interest] కలగాలంటే?

     మనం చేసే పనిమీద ఏకాగ్రత కుదరడానికి మనం చేసే పనిమీద మనకి ఆసక్తి ఉండాలన్నది నిర్వివాదాంశం.ఆసక్తి అంటే వినే విషయం మీద శ్రద్ధ,ఆ విషయాన్ని గురించి ఒక అనుభూతిని పొంది, ఆకళింపును చేసుకోగలగడం.పూర్వపుస్మృతికి ప్రస్తుత అనుభూతికి ఉన్న అపూర్వ సంబంధమే ఆసక్తి.అనేక యితర విషయాల్లోంచి మనకు ఆసక్తికరమైన విషయాన్ని మాత్రమే ఎన్నుకుని మనస్సులో పదిలపరచుకుందామనే విషయంపై తప్పక ఆసక్తిని పెంచుకోవాలి.ఆసక్తి ఉన్న విషయాలు అప్రయత్నంగానే గుర్తుంటాయి.

     అయితే మనకి ఆసక్తిలేని విషయాలపైన కూడా తప్పనిసరి పరిస్థితుల్లో ఆసక్తి,శ్రద్ధ పెంచుకోక తప్పదు.అవసరం వల్ల ఆసక్తి దానంతట అదే కలుగుతుంది.జీవితానికి అవసరమైనదానిని గుర్తుంచు తీరాలని నిర్ణయించుకోవాలి.అప్పుడు ప్రతి చిన్న విషయం తప్పనిసరిగా గుర్తుంటుంది.ఆసక్తిలేని విషయాలను అధ్యయనం చేయవలసిన సందర్భాలలో తమకు తాము 'ఆటోసజెషన్" ఇచ్చుకోవడం ద్వారా ప్రయోజనం పొందవచ్చు.

     ఏకాగ్రత,జ్ఞాపకశక్తి కేవలం ఆసక్తి మీదే ఆధారపడి ఉండవు.కేవలం ఆసక్తి ఒక్కటే ఏకాగ్రతకు,జ్ఞాపకశక్తికి కారణం కాదు.చేసే పని నచ్చకపోవడానికి కారణం నచ్చదనే దృఢాభిప్రాయంతో కూడిన భావనే.ఆ అభిప్రాయాన్ని మార్చుకుంటే ఆ పని నచ్చుతుంది.చేసే పని మీద న్యూన్యతాభావం కూడా ఆసక్తి లేకపోవడానికి మరో కారణం.ఆసక్తిని కలిగించుకుని,పెంపొందించుకుంటే సత్ఫలితాలు సిద్ధిస్తాయి.




వ్యాఖ్యలు లేవు:

వ్యాఖ్యను పోస్ట్ చెయ్యండి

మీ అమూల్యమైన అభిప్రాయాలు,సలహాలు,సూచనలు తెలియచేయగలరు.